نحن أهل الفرحة جينا ......
لا المدامع وقفتنا ولا الحكايات الحزينة ......
لما درب الرايحة جابنا في هذى المدينة ......
يا ولدي الدروب شقاقة بحر التيه .......
ليك درب ولا دربين .. مساك الدروب ضهاب .....
ليك قلب ولا بالين .. سواي القلوب كضاب
ليك ضهر ولا سرجين .. ركاب السروج وقاع .......
شق ياولدي بحر التيه بتدردر وتتودر .....
ولامن يوم علي حكايتنا ديك ترسى
ده عزك القبيل ذاخرنو ليك
الشوق بحر يا ولدي بحر تيه
قتليك العليك ادرابو لاتنغش
ولا ترضابو لاتنغش
في الزمن الزميم والكي يسوقو خلاف عشان الني
عليك الدور وتصريف الليالي بدور
تشيل ما شلنا من الهم
ولامن دمعة ترمي الدمعة فوق دربك
روح يابا وابقى كفاك لاتعاين
ولا تعاين علي موطاك
ولاتندم علي خطواً تملي مشيتو لي قدام
وابقى العاتي زي سنطتنا زي صبراً نلوك فوق مرو زي الذات
لا شيتن نزل في الجوف ولا بيرجع ولا بنزاح ......
واركز للبجيبها الريح تقيف انت ويشيله الريح
وابقى العاتي والدرب الوراك مسدود
شيل شيلتك بقيت للنص
لاحلما ً يجيب البر ولاحدود ....
ان بليتا اختى الرملة ما تقع المكان الهش
دي الممطورة ما بتبالي من الرش
والنعمة بتعرف عاطيها والجمرة بتحرق واطيها
بالكيلة عطانا ومالقينا
فوق جمر خطانا وما لقينا .......
يوم الوعد ياحليوة فيك الدنيا ماكانت شروق
الا الارض متكشفا ومتبلمة
ناعمنو من فيض الخريف لافحالها شال
والفرحة خدرى فرحة دوب تتشابا لعين الشمس
والبت حليوة اللابسة بيضة كذا الحليب
والروح مشحتفة في البلود الفيها ريحتك
للبعود من فزعة الغربة البساسق فوقا مو راجع
ولا بالحيل قليل
والروح مشحتفا في الحبيب القلب بكر
الدنيا ما شافت جديدو ولا الحزن دقالو باب
لو شفت كيف يوم الوعد
كيفنو مترامي الغمام والقمرى زعرد للبلوم
والنسمة هبت مرتين
يحليوة يوم دقيت بأرضك فاس خصيب
والتانية يوم الوعد والايد تسالم في الايدين
والام تقالد فوق جناها تشمو زين
وحليوة صاحية حليوة ضاحية كذا النسيم
والدنيا غيم وحليوة جد جد ياولد
قول للبلد قايل غناوة الحزن ليش
شايل مساديرك مجامر دمع ليش
ليش يابلد والناس تريد والدنيا كل ما نريد تزيد
تملى الايدين تفرح تهش
لو صحي غنينا بالدمعة الحميمة
لو دموع الفرحة ما لاقت غنانا
بكرة نرجع تاني للكلمة الرحيمة
شان هنانا ......... شان منانا .........
شان عيون اطفالنا ما تضوق الهزيمة
